如何去除衣服上的紅酒漬？ (By Eva酒小妹)

各位好杯中物既朋友一定忙住出席大大小小既 Party，飯局….當然唔少得飲返2杯 

不過, 唔知大家有冇試過飲紅酒時唔小心將酒倒落自己又或者人地件靚衫度，可恨既唔止係當下大家都極度尷尬,加埋你發現沾咗紅酒漬既係一件LB或CUCCI戰衣，相信果下真係好想拎把刀，向自己心口插一下 ( P.S. 看此文時需要家長指引 )

 

 

我酒小妹一於喺度教返大家幾招,等你件LB或者CUCCI唔駛報銷 total loss

 

食鹽 : 家居必備, 隨手可得
又快又慳錢既方法, 只要用一層鹽撒係酒漬上面, 襯D酒仲未徹底滲入布料，鹽結晶就可以輕易咁吸收酒漬，之後更容易洗乾淨。

大部分天然布料（如棉、牛仔布和亞麻布）比合成布料更快吸收紅酒，所以如果你件戰衣係天然布料，撒鹽一定要快, 狠, 準 ！

 

 

蘇打水 : 效果出眾既去漬神器
蘇打水呈弱鹼性，可以同葡萄酒中既酸性發生碳酸作用，消除顏色。只要將蘇打水倒喺酒漬上面，等佢起泡，繼續倒，直到酒漬顏色褪去, 之後等布料自然風乾。

 

貓砂 : 喵星人既貢獻
喺咪估唔到, 貓砂都竟然有佢既貢獻, 一眾貓奴會唔會覺得好 amazing , 貓砂可以去除紅酒漬, 主要係因為佢含吸收性非常強的化學物質，可以好快吸收液體，同鹽既作用相似，效果可能更好，但前題同樣喺要 : 快, 狼, 準！

方法喺用手輕輕按揉喺紅酒漬上面既貓砂，等貓砂慢慢吸收酒漬。之後就可以用吸塵機吸走布料上的貓砂。

 

剃鬚膏：最 man 既方法
貓奴有貓奴既方法,真男人亦都有最 man 既方法
剃鬚膏含去污成分，可以有滲透並去除布料上既酒漬作用。將剃鬚膏噴喺整個污漬上面，等它滲入布料，然後輕輕揉搓清洗就OK啦。

 

️白酒 : 酒小妹獨愛方法

點解我會話用白酒係我最愛既方法?
事關好多事出席既 gathering 都未必喺家居, 試問又點可能出門口前袋定D鹽,貓砂出街? 但我多數出席得有紅酒既 party, 同一定有佢既朋友仔 – 白酒,所以要即場解決問題,就話都無咁易
用白葡萄酒清除紅酒漬，係利用相似相溶原理。將白葡萄酒滴喺紅酒漬上面，然後比少少時間呢兩位朋友互相溝通一下, 中和一段時間之後，然後用紙巾或者厚毛巾擦擦，最後再用一般洗衣液清洗就得啦。

 

除咗學識方法, 仲要記低秘訣架!
（1）去紅酒漬，一定要快狠準！拖得越耐，越難清除。
（2）要吸乾酒漬，千其唔好太用力擦，以免酒精更深入布料，咁就好難清洗。

（3）參加party 都係著返深色戰衣好D, 白色/淺色戰衣, 可免則免啦。

 

唔知大家有冇試過咩深刻經歷? 又有咩萬試萬寧既方法, 快D share 吓造福大家啦!