葡萄酒也會暈船浪？(By 酒小妹Eva)

想當年酒小妹我第一次聽到酒先生問我知唔知葡萄酒都會暈船浪 ， 我聽到既時候真係當堂嚇一跳，然後得啖笑 。

正當我笑到咀都合唔埋既時候，身邊既酒先生就冷笑咗一聲，然後拋下一句 ~ 無知兼白痴。

死唔認輸既我，當然深深不忿被酒先生恥笑，結果經我明查暗訪後 ……… 當然知道自己衰咗。唔緊要! 學海無涯，酒海無邊，今日就等我一邊飲住酒，一邊同大家分享一下點解酒都會暈船浪。

點解酒先生話葡萄酒都會暈船浪? 原來葡萄酒喺經過長時間在海上飄浮的運輸過程後， 會產生俗稱“暈瓶”既狀態，英文叫Bottle Shock或Bottle sickness，其成因專家也未能準確論述，只知道葡萄酒像人一樣有生命的，就算被裝進酒瓶裡，也在不斷演化轉變，而葡萄酒裡的所有複雜元素如酚、單寧、香氣和味道的複合物，相互間都在不斷反應着，晃動會加速這些反應，或加速了短暫性的氧化，令酒短時間變得平平無其(Flat)，香氣暫時變得封閉，酒體鬆散，酸度會偏高等等...呢個時候既葡萄酒唔太適宜飲用。“暈瓶”既葡萄酒需要靜置一段時間，等瓶內酒體恢復活力， 咁就可以飲到酒原本最佳狀態啦。

 

一般剛到貨倉的新貨，都需要1-2星期讓酒靜止恢復，而處理婚宴酒時，我們也會安排早1-2天送到會場，讓酒保持靜態一陣子，到開瓶便達到最佳狀態。

所以暈船浪的酒不會永遠昏睡，只需要給他一點時間~

 

下次再同大家分享，我繼續嘆酒先~

(圖片來源 : BIZARROCOMICS.COM)

參考網址：http://www.winespectator.com/drvinny/show/id/44883