酒塞發霉了, 酒還能喝？

相信好多酒友都會遇過一個情況, 就係買咗支心頭好🍾返屋企, 煎好塊靚牛扒🍖 準備開酒🍷同 Honey 燭光晚餐既時候🍽。一開支酒, 發現酒塞有發霉現象, 立刻雅興盡銷, 坐地而哭 😭😭😭

咁究竟, 如果酒塞發霉, 係咪代表支酒唔飲得? 👀 答案可能令你意想不到!!! 因為你可能估唔到, 有好多酒莊會以酒窖中有發霉而驕傲 , 因為發霉既狀態對葡萄酒而言係濕度良好既環境😎
 

理論上，酒窖濕度唔可以低於50%，否則酒塞就會有干縮甚至乾裂既危險 😵 只有一定既濕度去保持濕潤，酒塞先能夠緊封住瓶口。如果瓶塞乾裂，酒液就會滲出，咁樣唔止會造成酒液損失，瓶入面既葡萄酒都會很快被氧化。所以，一般酒窖中濕度要常年保持係50%-70%之間。所以長期係高濕度環境之中，木塞都難免會面臨發霉困擾。尤其歐洲一D歷史悠久既葡萄酒名莊，由於葡萄酒陳年時間較長，酒窖內被霉腐覆都係司空見慣。所以話, 酒塞發霉既酒未必唔飲得。相對於長達5-6厘米既酒塞，表面上一點霉斑根本就無傷大雅。總之，酒塞表面有霉斑, 係同酒瓶內既酒質無任何聯繫，反而仲係一個酒窖濕度合格的標誌。所以我酒小妹就覺得, 葡萄酒塞既霉斑就好似女人既魚尾紋🐟一樣 🤣🤣 或者呢個比喻未必最恰當, 但我就覺得好傳神 , 因為都係同樣顯現咗歲月既痕跡而唔係變質既標誌。

咁…..如果真係見到心愛既葡萄酒,酒塞有發霉現象, 又可以點做? 🕵🏻‍♀
👉🏻大家可以先用濕布將瓶塞擦乾淨，倒出嚟醒酒後試飲
👉🏻如果醒酒後仍然有不良氣味，咁就代表酒有可能變壞
👉🏻如果葡萄酒香氣正常、酒體無異味，那就慶幸你無錯手倒咗一支好酒
 

🈲不過要記住，如果一次飲唔晒支酒而要將瓶塞塞返入酒瓶，有霉斑果一面唔好向下，以免污染酒液

大家睇到呢度, 都應該知道，對於葡萄酒嚟講黴菌並非壞事，甚至對於葡萄酒保存仲有積極作用。咁下次大家係屋企準備好美酒佳餚既時候, 就唔會因為發現酒塞發霉而大失所望啦! (如果大家真係遇到有酒塞發霉情況, 歡迎邀約我酒小妹一齊試吓支酒仲飲唔飲得, 不過前題係有美酒既同時, 都要有佳餚😂😂)

By 酒小妹 Eva

也看看我們的 Instagram 日常