Ripasso DOC 裏帕索

要講Ripasso就首先要輕輕講下Amarone, 傳統Amarone會提早少少採收葡萄，去保持良好酸度去平衡酒體，然後將健康成熟嘅葡萄放喺稻草上自然風乾，當然今時今日大部份都已轉用塑膠網甚至用架去代替。葡萄串都唔可以太過緊密，確保通風好去蒸發水份同保持葡萄健康。
風乾三至四個月後葡萄會因為水份蒸份失去原來重量約30~40%，咁糖分自然更高，單寧同風味物質都會更複雜濃縮，釀出嚟嘅酒自然顏色更深，更濃更香更複雜。
當然精選葡萄同風乾嘅額外人力時間都代表Amarone嘅酒價唔會太平。

而Ripasso 有Re-pass同go over again嘅意思，姐係會用老大Amarone或者Recioto壓榨後淨低嘅酒渣進行第二次發酵，亦都可以加最多15%嘅Amarone酒液或者部份用風乾葡萄，令本身基底嘅Valpolicella紅酒增添乾果同糖漬果嘅風乾風味，入口更濃縮，顏色酒精單寧酸度都推得更高，令成枝酒更有架構。
雖然用酒渣但質素絕對唔渣，可以話係Amarone嘅副牌。產區Valpolicella Ripasso亦喺2010年升格為法定產區DOC，可見其品質同重要程度。

咁Ripasso都理所當然地係由Amarone嘅葡萄品種Corvina、Corvinone、Rondinella同埋Molinara, 除左主要呢三隻之外，都仲可以用比較少見嘅Negrara, Forsellina, Pelara同Oseleta等。 

最重要同最多人知嘅都會係Corvina呢隻Amarone嘅靈魂葡萄。

Corvina佔咗成枝酒比例45%-95%，建構起Amarone大部份嘅酒體同香氣，顏色唔深單寧中等，除左紅車厘子之外，都會帶番出紅布冧、紫羅蘭同香草類香氣，同時佢嘅高酸都可以平衡番Amarone嘅厚重。

Rondinella 佔5%-30%，就係好在佢夠可靠，唔同泥土都啱種，產量高，抗病又好，高糖份嘅特性令佢好適合做Recioto，一般會做出比較平淡輕身帶簡單車厘子香氣嘅酒。

其他葡萄總量唔可以超過25%，而都無單一隻可以超過10%，芳香葡萄品種夾埋都唔可以超過10%。

Corvinone會提供紅車厘子果香同單寧，同埋佢個風乾效果好好

Molinara 都係產量高，雖然有紅果又輕身，但因為顏色比較淺，酸度過高同容易氧化近年都比較少種。

好多人都會覺得Amarone係甜甜地嘅款，雖然咁講都無可厚非，但有時就會令Amarone標上"甜"嘅刻板印象。
因為 Amarone 14%酒精嘅最高含糖量都只係12g/l, 等同於香檳Brut嘅maximum, 雖然更高酒精嘅話可以有再多少少糖，但技術上嚟講都仲係偏向dry果邊，最多可以話佢無一般紅酒咁dry。
而因為潮流同埋商業考慮，大部份Amarone個糖份都唔會去到咁盡，都會選擇發酵更多糖份換取更高酒精去令枝酒更dry(Amarone發明嘅時候係甜的)，所以變相好多Ripasso都會係dry的(除非用Recioto酒渣)。

最後Ripasso出到嚟最低要有 12.5%酒精，Superiore 要13%，除左頭先講到嘅乾果同糖漬果等風乾熟果風味，通常都會帶番Corvina嘅紫羅蘭花香，
由偏清新嘅中低酒體去到好厚重都有，中高單寧，有良好嘅酸度去平衡厚重嘅酒體同果香，陳熟2年先可以賣出市場～(Superiore要喺木桶陳熟1年)

價錢上亦對比起大哥Amarone更親民，相信大家一試就知道Ripasso嘅價值所在。