Wedding Wine Tips | Wine Couple 醇酒伴侶

婚宴紅酒點揀？按人數、菜式、預算一次搞清

籌備婚宴，最怕唔係冇酒，而係揀唔啱酒 - 買太貴，賓客未必飲得出；買太平，又驚比賓客話係超巿酒。所以講到婚宴紅酒點揀，重點從來唔只係「揀支有名氣」，而係要揀到啱場合、啱菜式、啱賓客口味，仲要啱預算。

婚宴用酒同平時兩公婆食飯開支酒，或者同朋友慢慢品酒真係唔同。平日你可以慢慢聞香氣、講年份、講單一酒莊，但婚宴現場節奏快、人多、菜一道接一道上，酒要做到嘅其實係三件事 - 易入口、夠穩陣、上枱唔失禮。只要捉實呢三點，揀酒就已經成功咗一大半。

婚宴紅酒點揀，先睇場合唔好只睇牌子

好多新人第一個反應都係問，婚宴係咪一定要揀法國酒？其實唔一定。法國酒當然格調高一啲，尤其波爾多喺婚宴場景一直好受歡迎，但如果你想要平靚正、風格穩定、賓客容易接受，其他國家如意大利、西班牙、智利、澳洲都有好多好選擇。

婚宴酒最實際嘅考量，係「大部分人會唔會覺得好飲」。因為你請嘅未必全部都係飲開紅酒嘅人，有長輩、有同事、有朋友，甚至有人平時只飲啤酒同汽水。呢種情況下，太重桶味、太高單寧、太後生澀口嘅酒，未必討好。反而果味乾淨、口感圓潤、酸度平衡嘅款，接受度通常高好多，亦即係滿足大眾口味為依歸。

如果婚宴場地偏正式，酒店宴會廳、會所、大型酒席，揀風格穩陣、標籤體面嘅酒會較易交代。如果你搞西式婚宴、自助餐、戶外婚禮，酒款可以靈活啲，唔使一味追傳統大牌，反而可以揀酒標外型新潮少少、易飲少少嘅款式，成個氣氛會更自然。

先按菜式配酒，比盲目追年份更實際

香港婚宴菜式通常都幾豐富，乳豬、海鮮、雞、牛、伊麵、炒飯甚至甜品都可能同場出現。要記住，婚宴紅酒唔需要逐道菜完美配對，因為現場做唔到咁細緻。你要揀嘅係一支可以應付大部分主菜、唔會同食物有明顯衝突嘅酒。

如果你嘅宴席以中式圍餐為主，尤其有燒味、鮑魚、濃味醬汁、牛肉呢類菜，通常適合中等至中重酒體、果味成熟、單寧唔好太硬嘅紅酒。Merlot、Shiraz、GSM blend，甚至較柔和風格嘅波爾多混釀，通常都幾穩陣。佢哋夠味，但唔會霸道到壓住成桌菜。

如果婚宴偏西式，主菜係牛扒、羊架、烤雞或者意粉，選擇空間就更大。

[Cabernet Sauvignon ]

可以好體面，但最好揀已經較圓熟、唔好太生硬嗰類。

[Pinot Noir]

風格優雅，水果氣息豐富，不過因為酒體較輕身，如果配合日間中午西式宴會，菜式較輕盈而且可選擇微 Chilled 雪凍少少飲，都係一個非常好的選擇。

有一點好多人會忽略 - 婚宴現場紅酒通常唔會喺最理想溫度、最理想杯型下飲用。所以本身已經要靠醒酒、時間打開香氣嘅款式，喺婚宴未必能發揮最好。與其買一支需要細味嘅酒，不如買一支一開就順口、一飲就明嘅酒。

預算點分配，先係婚宴買酒最關鍵一步

講到底，多數新人都係想喺體面同價錢之間搵平衡。婚宴酒最常見嘅失誤，唔係預算太少，而係預算分配錯。有人將 budget 集中喺兩三支「主家飲」靚酒，但大圍用酒就買得太普通，結果整體體驗反而唔協調。

實際做法係先定每支酒大概預算，再推返總數。婚宴紅酒通常唔需要買到收藏級，重點係品質可靠、價錢合理。對大部分賓客而言，一支飲落舒服、有少少層次、酒標企理嘅酒，已經好足夠。

如果婚宴人數多，建議唔好只追求高價酒款，因為賓客感受到嘅差距未必成正比。反而揀性價比高、風格大眾化嘅酒，成體效果往往更好。呢個位真係好現實 - 婚宴唔係品酒比賽，係整體招待體驗。

婚宴紅酒點揀數量，唔想買多買少就咁計

買幾多支，永遠係新人最常問嘅問題。簡單講，要睇三樣 - 總人數、開席時間、賓客飲酒習慣。如果係中午婚宴，通常飲酒量會低過晚宴；如果親友圈本身多飲家，用量自然要上調。

一般嚟講，如果婚宴以紅酒為主，兼有啤酒、汽水、果汁一齊供應，可以先以每圍2枝作預算 (紅白氣酒加起)，計上總數再分配紅白氣酒比例。

例如賓客入面長輩多、女士多、或者本身場內已提供香檳敬酒、啤酒任飲，紅酒需求未必去到最高。相反，如果係晚宴、朋友同事多、氣氛熱鬧，酒量通常會升。穩陣做法係留少少緩衝，但唔好盲目加太多。

酒商可以做混合訂購不需按齊箱數訂酒仲方便，預算數量更有彈性，即每箱12枝，你可以訂13枝或 14枝，不需要整整訂2箱 24枝酒的數量。

退酒或者回收婚宴酒真係可以慳錢著數啲？定還是一切都係糖衣陷阱 ?

新人最易揀錯嘅三個位

第一個錯位，係以為貴就一定啱婚宴。事實上，有啲高價酒風格好鮮明，識飲嘅人會欣賞，但婚宴場合未必最討好。第二個錯位，係淨係睇產區名氣，冇理會年份、風格同成熟度。第三個錯位，係完全唔理賓客口味，只按自己平時飲酒喜好去買。

你平時鍾意重桶、濃郁、辛香感強嘅酒，唔代表婚宴全場都會受。反過來講，如果你平時飲得好輕，婚宴菜式又濃味，酒太薄都會撐唔起個場。所以婚宴揀酒，永遠係「你鍾意」同「大家容易接受」之間搵平衡。

另外，唔少人會忽略服務細節。酒公司是否自己車隊送貨、送貨是否準時、有否提供試酒服務協助揀酒、或現貨供應等等...呢啲實際上比紙上談兵更重要。因為婚宴時間一近，最怕就係斷貨需臨時轉款。

想穩陣，記住呢種選酒思路

如果你想用最少時間搞掂婚宴用酒，可以直接用一個簡單框架。先決訂婚宴屬於正式定輕鬆，再睇菜式濃淡，之後定每支預算和預算訂購數量。

對大部分香港婚宴嚟講，一支中等酒體、果味成熟、單寧柔順、酸度唔會太尖嘅紅酒，通常最安全。產區方面，法國可以選較親民但風格穩陣嘅波爾多或南法；義大利可考慮偏易飲嘅紅酒；澳洲同智利就常常贏在性價比，夠直接、夠穩定、賓客接受度高。

如果你本身唔想研究太多術語，其實最聰明嘅做法唔駛睇資料酒評，而係搵熟婚宴場景嘅酒商幫你按人數、菜式同預算配搭，好似我地 Wine Couple 呢類以香港市場為主、又做開婚宴用酒嘅平臺，通常更明白本地酒席要求，同時可以兼顧價錢、現貨同送貨安排，仲提供免費試酒服務，自己上來試酒自己揀，呢啲對新人嚟講比聽邊個邊個講某某酒莊值得推介更實際得多。

講到尾，婚宴紅酒唔需要揀到最貴、最稀有、最有話題性，反而係要揀到大家飲得開心，自己又唔肉赤。當支酒做到陪襯婚宴氣氛、同菜式夾得埋、賓客拎起杯唔會皺眉，其實就已經揀得好。

如果閣下大日子已定好，可隨時搵我地幫手，一定揀到心水酒。

Wine Couple 技安 - 98896693 (What's app)

試酒室地址: 荃灣柴灣角街 84-92號順豐工業中心15樓O至 (試酒需提前預約)

婚宴酒詳細介紹

即時了解更多

婚宴酒點解要搵Wine Couple？

即時了解更多